Online Nepal
  • मंगलबार, २४ साउन २०७९
  • साउन दोस्रो सातासम्ममा नयाँ पार्टी घोषणा गर्छौं : महेन्द्र राय यादव (अन्तर्वार्ता)

    साउन दोस्रो सातासम्ममा नयाँ पार्टी घोषणा गर्छौं : महेन्द्र राय यादव (अन्तर्वार्ता)

    नेपालमञ्च संवाददाता
    साउन ४ २०७९, बुधबार
    258
    SHARES

    काठमाडौं : जनता समाजवादी पार्टी जसपा वैचारिक रुपले दुई धारमा विभाजित भएको छ । मधेश मुद्दाका कारण एक भएका दल सत्ताको विवादका कारण विभाजित हुँदा लामो समयदेखि उठाउँदै आएका मागहरु ओझेलमा पर्दै आएका छन् ।

    यतिबेला मधेशवादी दलहरु निर्णायक अवस्थामा किन मिल्न सक्दैनन् भन्ने प्रश्न पेचिलो बनेको छ । आज हामीले जसपा बाबुराम भट्टराई पक्षीय नेता महेन्द्र राय यादवसँग कुराकानी गरेका छौँ । प्रस्तुत छ यादवसँग गरिएको कुराकानीको संक्षिप्त अंश :

    उपेन्द्र यादव पक्षले तपाईलाई पदमुक्त गरेको छ । अब तपाईहरूको रणनीति के हुन्छ ?

    उपेन्द्र यादव पक्षले हामीमाथि गरेको कारबाही प्रेस रिलिज जारी गरेर खारेज गरिसकेका छौं । अब पार्टी पुर्नगठन गर्छौ यसको तयारी पनि गरिसकेका छौं । साथै, थप छलफललाई पनि सँगै लगिरहेका छौं । हाम्रो पार्टीको विस्तारित बैठकले पार्टीको सम्पूर्ण निर्णय गर्ने जिम्मेवारी कार्यकारीलाई दिएको छ । उहाँले परिस्थिति अध्ययन गरेर ठोस निर्णय लिनु हुने नै छ ।

    पार्टीको कार्यकारी भनेको को ? बाबुराम भट्टराई ?
    उहाँ मात्रै होइन । हामी ८–९ जना छौं ।

    नयाँ पार्टी गठनको बारेमा पनि छलफल अघि बढाएको हो र ?
    त्यो प्रक्रिया पनि अगाडि बढ्न सक्छ । बढ्नु पनि पर्छ । पुर्नगठनको परिस्थिति हेरेर अघि बढ्छौँ । अहिले त हामी छलफलकै चरणमा छौं । हामीलाई पनि निर्वाचनमा जानु नै छ । यसका लागि एउटा पार्टी नबनाई त सम्भव नै भएन नी ।

    तपाईहरूलाई उपेन्द्र यादवले पार्टीबाट मुक्त गर्ने तर सांसद पद भने यथावत रहने भनिरहेका छन् नी ?
    उनले कहाँ के गरे, कसो गरे त्यो उहाँकै विषय हो । उहाँका सबै निर्णयलाई हामीले खारेज गरिसकेका छौं । हामीले जनता समाजवादी पार्टी (जसपा)को केन्द्रीय कमिटीको छुट्टै बैठक बसेर पार्टी पुनर्गठनको प्रक्रिया अघि बढाइसकेका छौं ।

    तपाईहरूलाई बिरगंज बैठकको निम्तो आएन ?
    निम्तो आयो आएन ठूलो कुरा होइन । बिरगंज बैठकअघि नै पार्टीको बैठकमा पनि हामीलाई बोलाइएको थिएन । संसदीय दलको बैठक बारे पनि हामीलाई कुनै जानकारी गराइएन । यसरी लगातार बैठकमा नबोलाउनुबाट के देखिन्छ भने पार्टीको विधि विधानभन्दा फरक र गलत भइरहेको छ । यही क्रममा बिरगंज बैठक पनि भयो । यासबारेमा हामीसँग कुनै छलफल भएको थिएन । हामीलाई बोलाइएको पनि थिएन ।

    बिरगंज बैठकअघि पार्टीको मुख्यालयमा तीन जनाबीच छलफल हुनुपर्ने थियो त्यो भएन । दोस्रो, बैठक बसे पनि हामीलाई जानकारी दिइएन् । संसदीय दलको बैठकमा पनि कुनै जानकारी गराइएन् । यसरी एउटा समुहले एक पक्षीय ढंगले अघि बढेपछि हामी जाने अवस्था नै भएन । त्यसैको परिणाम स्वरुप हामीले पार्टीको विस्तारित बैठक बोलाएका हौँ ।

    तपाईहरूले यता बैठक बोलाए पनि पार्टीको बहुमत केन्द्रीय सदस्य त बिरगंज गए नी ?
    बहुमत सदस्य जता गए पनि उनीहरूले दिएको सन्देश महत्वपूर्ण छ । उनीहरु सबैको माग अझै पनि पार्टी एकताका लागि छलफल, वार्ता गर, पार्टी पुर्नसंरचना गर भन्ने छ । यो माग महत्वपूर्ण कुरा हो । संख्या ठूलो कुरा होइन ।

    तपाईहरूले यता बैठक नबढेको भए वातावरण अर्कौ बन्न पनि सक्थ्यो नी होइन ?
    अनि बिरगंज बैठकमा नबोलाएका हामी केन्द्रीय सदस्यहरु कहाँ जाने त ? पार्टीबाट हामीलाई कुनै जानकारी नआएका साथीहरू एक ठाउँमा भेला हुनु त पर्यो । यही कारण जडिबुटी बैठक आह्वान गरिएको हो ।

    भनेपछि उपेन्द्र यादवसँग मिलेरअघि बढ्ने ‘च्याप्टर क्लोज’ नै भइसकेको हो ?
    हाम्रो तर्फबाट यो पार्टीलाई बचाउन म र साथीहरूले बैठकबाटै आह्वान गरेका छौं । पहिला पनि पार्टी बचाउन धेरै नै प्रयास गरेकै हौ । यसरी पार्टी बचाउनुको एक मात्रै उदेश्य के थियो भने हामी जसपालाई एउटा वैकल्पिक शक्तिका रुपमा बनाउछौं भन्ने नै थियो । तर, उहाँहरुले पार्टी कम्जोर बनाउने बिभाजनको बाटोतर्फ लैजाने गरिरहनु भयो ।

    तपाईले यत्रो काम गर्दा गर्दै पनि तपाईलाई साथ दिइरहेका साथीहरु बिरगंज बैठकमा गए नी ?
    हामी अहिले पनि एउटै दलमा छौं । साथीहरु कहाँ गए कता गए ठूलो कुरा होइन । उहाँहरुसँग अहिले पनि मेरो नियमित कुराकानी भइरहेको छ ।

    पार्टी एकताको बारेमा उपेन्द्र यादवसँगै अहिले पनि कुरा हुन्छ ?
    होइन । पार्टी एकता च्याप्टरको त उहाँहरुले ढोका बन्द गरिसक्नु भएको छ । हामीले बैठकबाट पार्टी एकताको लागि आह्वान गर्दा उहाँले बैठकबाट त्यसतर्फ अघि बढ्ने निर्णय गर्नुपथ्र्यो । त्यो भएन । उहाँले गर्नु भएको कामबाट नै हामीले नयाँ बाटो लिएका हौँ ।

    समावेशी लोकतान्त्रिक पार्टी भनेर नयाँ दल गठन गर्दै हुनुहुन्छ रे हो ?
    यो पार्टी त स्थानीय तह निर्वाचन ताका नै दर्ता भइसकेको छ । यसमा अहिलेसम्म कुनै प्रकारको छलफल भएको छैन । तर साउनको दोस्रो हप्तासम्ममा नयाँ घोषणा चाहि हुन्छ ।


    फेसबुक प्रतिक्रिया
    सम्बन्धित समाचार
    नयाँ अपडेट

    Copyright © All right reserved to Nepalmanch.com Site By: SobizTrend