काठमाडौँ – गोरखा भूतपूर्व सैनिक संघ (गेसो)का पदाधिकारीहरुले प्रधानमन्त्री शेरबहादुर देउवासँग भेटवार्ता गरेका छन् ।

बिहीबार प्रधानमन्त्री निवास बालुवाटार पुगेर गेसोका पदाधिकारीहरुले देउवासँग भेटवार्ता गरेका हुन् । गेसो सभापति कृष्णकुमार राईको संयोजकत्वमा बालुवाटार पुगेको प्रतिनिधिमण्डल र प्रधानमन्त्री देउवाबीचको छलफल भएको हो । सो छलफलमा माओवादी केन्द्रका अध्यक्ष पुष्पकमल दाहाल प्रचण्ड पनि सहभागी भएका थिए ।

प्रधानमन्त्री देउवा र अध्यक्ष प्रचण्डसँग गेसोको टोलीले नेपाल र बेलायतबीच हुन गइरहेको वार्तामा के कस्तो तयारी भइरहेको छ भन्ने प्रश्न गरेका थिए । प्रधानमन्त्री देउवाले वार्ताको मिति तोकि नसकिएको र आगामी जुलाईमा वार्ता शुरु हुनसक्ने बताएको गेसो सभापति राईले जानकारी दिए ।

यदि जुलाईमा वार्ता शुरु नभए पनि नेपाल र बेलायतबीच भूतपूर्व गोर्खा सैनिकका बारेमा वार्ता भएरै छाड्नेमा आफू आशावादी रहेको पनि प्रधानमन्त्री देउवाले बताएको अध्यक्ष राईको भनाइ छ ।

यस्तै गेसोको पदाधिकारीहरुले परराष्ट्र मन्त्रालय र बेलायतस्थित नेपाली दूतावासले छलफल गर्दा गेसोलाई सहभागी नगराएको बारेमा पनि प्रधानमन्त्री देउवाको ध्यानाकर्षण गराएका छन् ।

जवाफमा प्रधानमन्त्री देउवाले वार्ता टोलीको संयोजकलाई सरोकारवालाहरुसँग छलफल गर्न निर्देशन दिइसकेको बताएका थिए । गेसोले गोरखाहरुका सन्तानलाई वंशजको आधारमा नागरिकता दिन पनि प्रधानमन्त्रीसित माग गरेका छन् ।