Online Nepal
  • शनिबार, ११ असार २०७९
  • हुण्डी नियन्त्रणमा कठोर बन्दै सरकार, प्रहरीको निगरानीमा ठमेल, नरदेवी क्षेत्र

    हुण्डी नियन्त्रणमा कठोर बन्दै सरकार, प्रहरीको निगरानीमा ठमेल, नरदेवी क्षेत्र

    प्रकाश बस्याल
    असार ८ २०७९, बुधबार
    543
    SHARES

    काठमाडौं :  गैरकानुनी कारोवारका रुपमा चिनिने हुण्डी नियन्त्रण गर्न सरकारले कडाई गर्ने भएको छ । हुण्डीलाई निरुत्साहित गर्दै बैंकिङ च्यानलमार्फत कारोवार गर्न प्रोत्साहन गरेको सरकारले हुण्डीको व्यवसाय नरोकिएपछि कडाई गर्ने भएको हो ।

    प्रहरीले हुण्डीको बढि कारोवार हुने क्षेत्रमा निगरानी बढाएको जनाएको छ । साथै हुण्डी कारोवारमा संलग्न व्यवसायीलाई पनि सुक्ष्म निगरानी गरिरहेको प्रहरीको भनाई छ ।

    काठमाडौं उपत्यका प्रहरी कार्यालयका प्रवक्ता सन्तोष सिंह राठौरले हुण्डी कारोवारीविरुद्ध प्रहरी कठोर बनेको बताए । उनले हुण्डी कारोवार हुने शंंकास्पद ठाँउहरुमा निगरानी बढाइएको जनाए। ‘प्रहरीले हुण्डी नियन्त्रण गर्न आफ्ना संयन्त्रहरु परिचालन गरेको छ ।

    ‘हामीले त्यस्ता क्षेत्र र व्यवसायीमाथि निगरानी बढाएका छौं,’ उनले नेपालमञ्चसँगको कुराकानीमा भने, ‘कारोबारमा संलग्नको खोजी गर्ने, शंका लागेकाहरुलाई अनुसन्धान गर्ने काम भइरहेको छ ।’

    पछिल्लो समय चिनियाँ व्यापारीहरुको हव बन्दै गएको ठमेल, नरदेवी र एट्खालगायतका क्षेत्रमा प्रहरीले निगरानी बढाएको छ । ‘यी क्षेत्रमा हुण्डीका एजेण्टहरु खुलेआम कारोवार गर्ने गरेको सूचनाका आधारमा प्रहरीले ति ठाउँमा कडाइ गर्न थालेको छ,’ प्रहरीका एक अधिकारीले भने, ‘सादा पोसाकका प्रहरी परिचालन गरेर अनुसन्धान गरिरहेका छौं ।’

    के हो हुण्डी ?

    बैंकिङ्ग प्रक्रिया भन्दा बाहिरवाट रकमको ओसारपसार गर्नु नै सामान्य अर्थमा हुण्डी हो । सरकारी तथ्यांकमा नआउने गरी व्यक्तिगत सम्पर्कका आधारमा अनौपचारिक माध्यमबाट भित्रिने रकम हुण्डी हो । हुण्डी अन्तरदेशबीच पैसा कारोबार गर्ने अवैध तरिका हो । दुवै देशमा सम्पर्क व्यक्तिहरू राखेर यस्तो कारोबार हुने गरेको छ ।

    नेपालबाट कुनै पनि देशमा पैसा पठाउन हुण्डीका एजेन्टले आफ्नो एजेन्टलाई खबर गरेर एजेन्टमार्फत कारोबार गर्ने गर्दछन् । यसबापत उनीहरूले केही प्रतिशत कमिशन लिने गर्छन् । हुण्डीबाट रेमिट्यान्स नै आएपनि यो अनौपचारिक माध्यमबाट आउने भएकाले यो राष्ट्रिय अर्थतन्त्रको रेमिट्यान्समा गनिँदैन । जसले गर्दा सरकारी कोषमा विदेशी मुद्रा आएको तथ्यांक देखिँदैन ।

    यस्तो छ कानुनी व्यवस्था

    हुण्डी कारोवारीलाई कारवाही गर्नेबारेमा कानुनीरुपमा स्पष्ट व्याख्या छैन । बैंक तथा वित्तीय संस्था सम्बन्धी ऐन, २०७३ अनुसार नै हुण्डीसम्बन्धि अपराधलाई पनि विदेशी विनिमय अपचलनमा अनुसन्धान र अभियोजन गर्ने गरिएको छ ।

    बैंक तथा वित्तीय संस्था सम्बन्धि ऐन, २०७३ को दफा १०३ को उपदफा (१) को खण्ड (क) बमोजिमको कसुर गरेमा बिगो जफत गरी बिगोको तीन गुणासम्म जरिवाना र पाँच वर्षसम्म कैद, (ख) दफा १०३ को उपदफा (१) को खण्ड (ख) बमोजिमको कसुर गरेमा बिगो भए सोे जफत गरी बिगोको दुई गुणासम्म जरिबाना र दुई वर्षसम्म कैद, (ग) दफा १०३ को उपदफा (१) को खण्ड (ग), (घ), (ङ), (च) वा (छ) बमोजिमको कसुर गरेमा बिगो भए सो जफत गरी बिगो बराबरको जरिवाना र एक वर्ष सम्म कैद सजायको व्यवस्था गरेको छ ।

    राजश्व अनुसन्धान विभागले आर्थिक बर्ष २०७८–०७९ को जेठ महिनासम्म विदेशी मुद्रा अपचलन सम्बन्धि ५९ वटा मुद्धा दर्ता गरेको छ । प्रहरीले नियन्त्रणमा लिएका व्यक्तिहरुविरुद्ध मुद्धा दायर गरेको राजश्व अनुसन्धान विभागका उप–निर्देशक दिवस आचार्यले बताए ।

    विभागका उपन्यायाधिवक्ता अर्नुनप्रसाद कोइरालाले नेपालमा हुण्डी नियन्त्रणका लागि कडा कानुनी व्यवस्था हुनुपर्नेमा जोड दिए । ‘राष्ट्र बैंकले अनुगमनलाई कडाइ नगर्दा पनि हुण्डी कारोबार बढेको हो,’ उनले भने ।


    फेसबुक प्रतिक्रिया
    सम्बन्धित समाचार
    नयाँ अपडेट

    Copyright © All right reserved to Nepalmanch.com Site By: SobizTrend