राष्ट्रपति विद्यादेवी भण्डारी बंगलादेश प्रस्थान

काठमाडौँ । राष्ट्रपति विद्यादेवी भण्डारी बंगलादेश प्रस्थान गरेकी छन् । आज बिहान त्रिभुवन अन्तर्राष्ट्रिय विमानस्थलबाट दुई दिने राजकीय भ्रमणका लागि उनी बंगलादेश प्रस्थान गरेकी हुन् ।
राष्ट्रपति भण्डारीलाई बिदाइ गर्न विमानस्थलमा उपराष्ट्रपति नन्दबहादुर पुन, प्रधानमन्त्री केपी शर्मा ओली, सभामुख अग्नि सापकोटा, राष्ट्रिय सभा अध्यक्ष गणेशप्रसाद तिमल्सिना, उपप्रधानमन्त्री ईश्वर पोखरेल, नेकपा एमालेका नेता सुवास नेम्वाङलगायत पुगेका थिए।

बङ्गलादेशका राष्ट्रपिता शेख मुजिबुर रहमानको जन्मशताब्दी विशेष समारोहका अवसरमा त्यहाँका राष्ट्रपति मोहम्मद अब्दुल हमिदको मैत्रीपूर्ण निमन्त्रणामा राष्ट्रपति भण्डारी गएकी हुन्।

नेपाली प्रतिनिधिमण्डलको नेतृत्व गर्दै राष्ट्रपति भण्डारी सोमबार बिहान ८ः३० बजे त्रिभुवन अन्तर्राष्ट्रिय विमानस्थलबाट राष्ट्रिय ध्वजावाहक नेपाल वायु सेवा निगम (नेपाल एयरलाइन्स) को न्यारो बडी ए ३२० जहाजबाट ढाका प्रस्थान गरेकी छन्। भ्रमणका क्रममा विभिन्न महत्वपूर्ण सम्झौता हुने बताइएको छ ।