कसले पाउला नेकपाको आधिकारिता ? सर्वाेच्चले फागुन २० गते टुंगो लगाउँदै

काठमाडौं : नेपाल कम्यूनिष्ट पार्टी नेकपाका नाममा तीन वटा राजनीतिक दल खोलिएका छन् ।

तीन वटै दलले आफू नै आधिकारिक भएको दावी गर्दै आएका छन् । त्यतिमात्रै होइन, यी सबै दलले नेकपाकै नाममा राजनीतिक गतिविधि गर्दै आएका छन्।

त्यसमध्ये एउटा नेकपा सत्तामा छ, अर्काे नेकपा भूमिगत राजनीति गर्दै आएको छ भने तेस्रो नेकपा शान्तिपूर्ण राजनीतिमा भएपनि राष्ट्रिय राजनीतिमा खासै दृश्यमा देखिदैन ।

रोचक त के छ भने सत्तामा रहेको नेकपा पनि यतिबेला दुई समूहमा विभाजित छ ।

एउटा नेकपाको नेतृत्वको अध्यक्ष एवं प्रधानमन्त्री केपी शर्मा ओलीले गरेका छन् भने अर्काे नेकपाको नेतृत्व प्रचण्ड नेपालले गर्दै आएका छन् ।

यी दुई नेकपाबीच पनि आधिकारिताको लडाइँ जारी छ ।

सत्तारुढ दल नेकपाकै आधिकारिताको विषय पेचिलो भइरहेका बेला सर्वाेच्च अदालतले नेकपा आधिकारीताको फैसला गर्दैछ ।

सर्वोच्च अदालतले नेपाल कम्युनिष्ट पार्टी नामको दल कसको भन्ने विवादको निर्णय यही फागुन २० गते दिने भएको हो ।

न्यायाधीश बमकुमार श्रेष्ठ र कुमार रेग्मीको इजलासमा नेपाल कम्युनिष्ट पाटी (नेकपा) ले आफ्नो पार्टीसँग नाम जुधाएको विवादमा नेपाल कम्युनिष्ट पार्टीका अध्यक्ष ऋषिराम कट्टेलले दायर गरेको रिट निवेदनको सुनुवाइ सकिएपछि फैसला सुनाउने मिति तोकिएको हो ।

नेकपाका अध्यक्ष कट्टेलले निर्वाचन आयोगमा २०६९ मा नेकपाका नाममा आफूले दल दर्ता गरेको तर तत्कालीन नेकपा (एमाले) र नेकपा (माओवादी केन्द्र) बीच २०७५ साल जेठ ३ मा एकतापछि नेपाल कम्युनिष्ट पार्टी (नेकपा) कै नाममा निर्वाचन आयोगमा दल दर्ता भएकाविरुद्ध रिट निवेदन दायर गरेका थिए। ।

अध्यक्ष कट्टेलले निर्वाचन आयोगमा उतिबेलै त्यसविरुद्ध उजुरी दिए पनि केपी शर्मा ओली र पुष्पकमल दाहाल ‘प्रचण्ड’ अध्यक्ष रहेको नेपाल कम्युनिष्ट पार्टी (नेकपा)को पक्षमा निर्णय गरेको थियो ।

हाल ओली र दाहाल पक्षबीचमा पनि विवाद देखिएका बेला आयोगको यस मुद्धाको फैसला अर्थपूर्ण हुन सक्नेछ । आयोगको उक्त निर्णयविरुद्ध अध्यक्ष कट्टेलले २०७५ साल मङ्सिर २१ गते रिट दायर गरेका थिए।