कोरोना विमितको विवरण सात दिनभित्र पठाउन स्वास्थ्य मन्त्रालयको निर्देशन

काठमाडौं : स्वास्थ्य तथा जनसंख्या मन्त्रालयले कोरोना विमितको विवरण सात दिनभित्र पठाइसक्न कोरोना परीक्षण गर्ने सबै प्रयोगशालालाई निर्देशन दिएको छ ।

कोरोना बिमाको रकम प्रमाणीकरणको क्रममा प्रयोगशालाबाट प्राप्त विवरण मध्ये केहि विवरण पुष्टि नभएको भन्दै मन्त्रालयले सोमबार सबै प्रयोगशालालाई निर्देशन दिएको हो ।

विमितको विवरण राष्ट्रिय जनस्वास्थ्य प्रयोगशाला र इपिडिमियोलोजी तथा रोग नियन्त्रण महाशाखा (इडिसिडी) लगायतका निकायमा पठाउनुपर्नेछ ।

सात दिनभित्र विवरण तोकिएको ढाँचामा उपलब्ध नगराए कोरोना बिमाको दावी प्रमाणीकरण अयोग्य रहने मन्त्रालयले स्पष्ट पारेको छ ।

साथै छुटेका विमित व्यक्तिलाई सम्बन्धित प्रयोगशालाले नै क्षतिपूर्ति दिनुपर्ने मन्त्रालयले चेतावनी दिएको छ ।

मन्त्रालयका अनुसार १८ हजार कोरोना विमितको विवरण प्राप्त भएकोमा १५ हजार भन्दा बढी प्रमाणीकरण भइसकेको छ ।

यस्तै, कोरोना बिमाका लागि विमितहरुले अनावश्यक दौडधुप गर्न परेकोमा सरकारको ध्यानाकर्षण भएको मन्त्रालयले जनाएको छ।

विमामा भइरहेको काम प्रक्रियाबारे विमितलाई स्पष्ट जानकारी दिन मन्त्रालयले सम्बन्धित निकायलाई आग्रह गरेको छ।