मुख्यमन्त्रीको दवाव अस्वीकार गर्दै सभामुखले बोलाए प्रदेश सभा बैठक, अविश्वासको प्रस्ताव पेश हुने

काठमाडौं : प्रदेश एकको प्रदेश सभा बैठक बस्ने भएको छ ।

बैठक रोक्न मुख्यमन्त्री शेरधन राईले दिएको दवाव सभामुखले प्रदीप कुमार भण्डारीले अस्वीकार गर्दै प्रदेश सभा बोलाएका हुन् ।

सभामुख भण्डारीले प्रदेश सभा बैठक दिउँसो दुईका लागि बोलाएका छन् ।

बैठकमा अविश्वासको प्रस्ताव पेश हुने जनाइएको छ । प्रदेशसभाका सचिव गोपाल प्रसाद पराजुलीद्वारा जारी बैठकको कार्यसूचीमा अविश्वासको प्रस्ताव पेश हुने उल्लेख छ ।

यसअघि सत्तापक्षीय सांसदहरुले नै प्रदेशसभा बैठकअवरुद्ध गर्दै आएका छन् ।

मुख्यमन्त्री राईविरुद्ध नेकपाकै प्रचण्ड नेपाल समूहका सांसदहरुले अविश्वासको प्रस्ताव दर्ता गरेका छन् ।

मुख्यमन्त्री राई अविश्वासको प्रस्ताव पेश हुन नदिन प्रदेश सभा बैठक स्थगन गर्न सभामुखलाई दवाव दिँदै आएका थिए ।

आइतबार बिहान पनि मुख्यमन्त्री राई र सभामुख भण्डारीबीच प्रदेश सभा बैठकबारे छलफल भएको थियो ।

छलफलमा मुख्यमन्त्री राईले प्रदेश सभा बैठक सूचना टाँसेर स्थगन गन दवाव दिएका थिए ।

तर सभामुख भण्डारीले मुख्यमन्त्रीको दवाव अस्वीकार गरेर प्रदेश सभा बैठक बोलाएका हुन् ।